گوجرانوالہ میں ریسکیو 1122 کی جانب سے حادثات کے متاثرین کی یاد میں تقریب

ریسکیو 1122 کے زیراہتمام ٹریفک حادثات کے متاثرین کی یاد میں تقریب کا انعقاد کیا گیا ، اس موقع پر بروقت طبی امداد فراہم کر کے شہریوں کو بچانے والے ریسکیورز کو خراج تحسین پیش کیا گیا ۔اس حوالے سے سیمینار اورآگاہی واک کا اہتمام بھی کیا گیا۔ سیمینا ر کے بعدسنٹرل سٹیشن ریسکیو1122سے گوندلانوالہ چوک تک آگاہی واک کا انعقاد کیا گیا جس میں شرکاء نے پلے کارڈز اور بینرز اٹھا رکھے تھے۔
آگاہی واک میں گوجرانوالہ کے ریسکیو اہلکاروں کے ساتھ ساتھ کثیر تعداد میں ریسکیومحافظ اور طلباء نے بھی شرکت کی۔اس موقع پرڈسٹرکٹ ایمرجنسی آفیسر سید کمال عابد کا کہنا تھا شہری ہمیشہ جلد بازی اورتیز رفتاری کی وجہ سے حادثات کاشکا رہوتے ہیں جسے منظم حکمت عملی کے ذریعے کم کیا جاسکتا ہے اور ریسکیو 1122 نے حادثات کی روک تھام کیلئے مربوط اور ترجیحی بنیادوں پر کام کیا ہے تاکہ آنیوالے وقت میں ٹریفک حادثات میں کمی لائی جا سکے ۔