گوجرانوالہ: نکے تھانیداروں کو ترقی مل گئی، ڈھول کی تھاپ پر بھنگڑے، مٹھائیاں تقسیم

ریجنل پولیس پروموشن کمیٹی کا اجلاس ، 33اسسٹنٹ سب انسپکٹرز کو سب انسپکٹر کے عہدہ پر ترقی دی گئی ۔ملازمین میں خوشی کی لہر دوڑ گئی ، ڈھول کی تھاپ پر بھنگڑے بھی ڈالے ۔تفصیل کے مطابق ریجنل پولیس آفیسر طارق عباس قریشی کی زیر صدارت پروموشن کمیٹی کا اجلاس منعقد ہوا ۔جس میں اسسٹنٹ سب انسپکٹرز کو سب انسپکٹر کے عہدے پر ترقی دینے پر غور کیا گیا ۔کمیٹی کے ممبران نے ملازمین کے سروس ریکارڈکی چھا ن بین ، کردار ، شہرت اور کام سے دلچسپی کو مدنظر رکھتے ہوئے 33اسسٹنٹ سب انسپکٹرز کو سب انسپکٹر کے عہدے پرپروموٹ کرتے ہوئے انہیں مبارک باد دی اور ہدایت کی کہ وہ اپنے کام میں نکھار پیدا کرتے ہوئے اپنے سروس ریکارڈ کو مزید بہتر بنائے۔ ریجنل پولیس آفیسر طارق عباس قریشی نے ترقی پانے والے اسسٹنٹ سب انسپکٹرز سے کہا کہ وہ محکمہ پولیس کا ایک اہم حصہ ہیں ۔ ترقی پانے سے آپ کے کندھے پر ذمہ داریوں کا بوجھ بڑھ گیا ہے اور انہیں یقین ہے کہ وہ ان ذمہ داریوں کو احسن طریقے سے نبھائیں گے ۔