لاہور، گوجرانوالہ سمیت پنجاب کے کئی شہروں میں بارش، نشیبی علاقوں میں پانی ہی پانی

لاہور: ساون کی جھڑی پھر لگ گئی، لاہور، گوجرانوالہ، قصور سمیت پنجاب کے مختلف علاقوں میں بارش سے کاروبار زندگی معطل ہوکر رہ گیا ہے حبس میں حبس کمی آگئی۔ نشیبی علاقوں میں پانی ہی پانی جمع ہے جبکہ بجلی کی آنکھ مچولی بھی جاری ہے۔
بارش کے باعث نشیبی علاقوں میں پانی جمع ہوگیا۔ لیسکو کا سسٹم بھی بیٹھ گیا جس سے کئی علاقوں میں بجلی غائب ہوگئی۔ قصور سمیت پنجاب کے مختلف علاقوں میں بھی ابرم کرم برسا جس سے موسم تبدیل ہوگیا، شہریوں کے چہرے کھل اٹھے، بعض علاقوں میں سڑکیں تالاب بن گئیں۔
گوجرانوالہ کی تحصیل وزیر آباد میں گزشتہ روز کرنٹ لگنے سے دوکمسن بھائی، انکے ماموں اور ایک ملازم ہلاک ہوگیا۔ گوجرانوالہ کی تمام شاہراہوں پر پانی جمع رہا تاہم واسا کا عملہ نکاس آب میں مصروف نظر آیا۔
گوجرانوالہ سمیت مختلف شہروں میں بارش کا سلسلہ رات سے جاری ہے۔ دوسری طرف موسم کی خبر دینے والوں کا کہنا ہے اسلام آباد، راولپنڈی، گوجرانوالہ، سرگودھا، فیصل آباد، ملتان، بہاولپور ڈویژن سمیت پنجاب کے مختلف مقامات پر مزید بارش کا امکان ہے۔ پشاور، مردان، ہزارہ، ڈی آئی خان، کوہاٹ، بنوں سمیت خیبر پختونخوا کے مختلف علاقوں میں بھی گرج چمک کے ساتھ بادل برسیں گے۔