وزیراعظم کی کامیاب دورے کے بعدواپسی ، گوجرانوالہ میں پی ٹی آئی کی ریلی، مٹھائی تقسیم

عمران خان نے اقوام متحدہ میں پاکستانیوں کا سر فخر سے بلند کر دیا :ایم پی اے شاہین رضا
گوجرانوالہ (نیوز رپورٹر) وزیر اعظم عمران خان کے اقوام متحدہ کے کامیاب دورے کے بعد واطن واپسی پر جی ٹی روڈ پر پی ٹی آئی کارکنوں نے ریلی نکالی اور عمران خان کو خراج تحسین پیش کیا۔ ریلی کے شرکا نے مٹھائی تقسیم کی اورعمران خان کی سلامتی کے لیے دعا بھی کی ۔ ریلی کی قیادت خاتون ایم پی اے شاہین رضا نے کی۔ریلی گوندلانوالہ چوک سے شروع ہوئی اور جی ٹی روڈ سے ہوتے ہوئے سیالکوٹی دروازے پر اختتام پذیر ہوئی ۔ شرکا نے پاکستانی اور کشمیری پرچم اٹھا رکھے تھے ۔ ایم پی اے شاہین رضا کا کہنا تھا کہ عمران خان نے اقوام متحدہ میں پاکستانیوں کا سر فخر سے بلند کر دیا ہے ۔عمران خان نے کشمیریوں کا مقدمہ بھرپور طریقہ سے پیش کیا اوردنیا کو مودی کا اصل چہرہ دکھا یا ہے ،عمران خان نہ صرف پاکستان بلکہ امت مسلمہ کے بھی لیڈر کے طور پر سامنے آئے ہیں۔