عمران خان بطور وزیراعظم مدت پوری نہیں کر پائیں گے : بلاول کی پیشین گوئی

احتجاج کہیں غیر جمہوری قوتوں کو دخل اندازی کا موقع فراہم نہ کر دے ، جمہوریت ڈی ریل کرنے نہیں دیں گے مارشل لا لگا تو تاریخی کردار ادا کرینگے حکمران پارلیمنٹ کو تالا لگائیں گے تو سیاسی جماعتیں مجبور ہوں گی ، جناح ہسپتال کا دورہ
کراچی (سٹاف رپورٹر) پیپلزپارٹی کے چیئرمین بلاول بھٹو نے کہا ہے کہ احتجاج کہیں غیر جمہوری قوتوں کو دخل اندازی کا موقع فراہم نہ کر دے ،حکومت سمجھے ملک چلانا کرکٹ نہیں، حکمران پارلیمنٹ کو تالا لگائیں گے تو سیاسی جماعتیں مجبور ہونگی، عمران خان بطور وزیراعظم اپنی مدت پوری نہیں کر پائیں گے کیونکہ ان میں اتنی صلاحیت ہی نہیں ہے ،پاکستان کی تمام سیاسی قوتیں بلکہ زندگی کے ہرشعبے سے وابستہ افراد کٹھ پتلی حکومت کے خلاف احتجاج پر مجبور ہیں۔ سلیکٹڈ حکومت کے خلاف احتجاج ضرورکریں گے لیکن کسی کوجمہوریت ڈی ریل کرنے نہیں دیں گے ۔ کراچی کا جناح پوسٹ گریجویٹ میڈیکل سینٹر پشاور کے لیڈی ریڈنگ ہسپتال سے ہزار گنا بہتر ہے ۔ ان خیالات کا اظہار انہوں نے جناح پوسٹ گریجویٹ میڈیکل سینٹرکے مختلف شعبہ جات بشمول سائبرنائف، پیٹ سکین، سرجیکل کمپلیکس اور ریڈیالوجی ڈیپارٹمنٹ کے دورے کے بعد صحافیوں سے گفتگو کرتے ہوئے کیا۔ اس موقع پر وزیراعلیٰ سندھ مرادعلی شاہ، وزیر صحت ڈاکٹر عذرا ، وزیر اطلاعات سعیدغنی، مشیر وزیراعلیٰ مرتضیٰ وہاب، جناح ہسپتال کی ایگزیکٹو ڈائریکٹر ڈاکٹر سیمی جمالی، پروفیسر طارق محمود اور دیگر موجود تھے ۔ ڈاکٹرسیمی اور پروفیسر طارق نے مختلف شعبوں سے متعلق بریفنگ دی۔ میڈیا سے گفتگو میں بلاول بھٹو کا کہنا تھا کہ حکومت کے خلاف احتجاج کے باوجود جمہوریت کو ڈی ریل نہیں ہونے دیں گے ۔ حکومت معاملات کو مہذب طریقے سے حل کرے ، ملک چلانے اور کرکٹ میچ کھیلنے میں بہت فرق ہوتا ہے ۔ وزیراعظم کو چاہیے کہ وہ لوگوں میں اتفاق و اتحاد پیدا کریں نہ کہ وہ الیکشن میں دھاندلی کروائیں۔ ان کا کہنا تھا کہ مولانا فضل الرحمن کا آزادی مارچ اور پیپلزپارٹی کی کراچی سے کشمور تک مہم سلیکٹڈ حکومت کے خلاف ہے ، اگر ملک میں مارشل لا نافذ کیا گیا تو پیپلزپارٹی اپنا تاریخی کردار ادا کرے گی۔انہوں نے سیاسی قوتوں کو مشورہ دیا کہ وہ حکومت کے خلاف جدوجہد میں خیال رکھیں کہ کہیں احتجاج غیر جمہوری قوتوں کو دخل اندازی کا موقع فراہم نہ کر دے ۔ بلاول بھٹو نے کہا کہ دنیا میں سائبرنائف جیسی صرف 300 مشینیں ہیں جن میں سے ایک جناح ہسپتال کراچی میں موجود ہے اور یہ دنیا کا واحد ہسپتال ہے جہاں اس مشین کے ذریعے مفت علاج کیا جاتا ہے ۔