90مقامات سے تجاوزات مسمار کرکے سامان ضبط کرلیا گیا

جی ٹی روڈ سمیت اہم شاہرات پر گرینڈ آپریشن ،40مقامات سے پختہ تھڑے مسمار
گوجرانوالہ (سٹی رپورٹر)میونسپل کارپوریشن نے تجاوزات کے خلاف گرینڈ آپریشن جاری رکھتے ہوئے 90مقامات سے تجاوزات مسمار کرکے سامان ضبط کرلیا ،لینڈمنیجر میونسپل کارپوریشن عارف محمود بٹ کی زیر نگرانی انسپکٹرز اور دیگر عملہ نے جی ٹی روڈ سمیت اہم شاہرات پر گرینڈ آپریشن کیا اور40 مقامات سے پختہ تھڑے مسمار کردیئے جبکہ دیگر مقامات سے ریڑھیاں ،دکانوں کے پھٹے ،کرسیاں ،ٹیبل اور دیگر سامان ضبط کرلیا گیا اور سینکڑوں دکانداروں اور تاجروں کو آج تک کی وارننگ دی گئی۔ کمشنر وایڈمنسٹریٹر میونسپل کارپوریشن ذوالفقار گھمن اور چیف آفیسر کارپوریشن امجد ڈھلوں کی ہدایت پر میونسپل کارپوریشن کے عملہ نے تجاوزات کے خلاف آپریشن چوتھے روز بھی جاری رکھا تھا۔