شہریوں نے پتنگ بازی پر پابندی کو ہوا میں اڑا دیا

چھٹی کے روز گلی ، محلوں ،سڑکوں اور پارکوں میں سرعام پتنگ بازی
گوجرانوالہ (کرائم رپورٹر) شہریوں نے پتنگ بازی پر پابندی کے احکامات کو ہوا میں اڑا دیا ۔ گلی ، محلوں ،سڑکوں اور پارکوں میں سرعام پتنگ بازی کا سلسلہ جاری ہے ،چھٹی کے دن آسمان رنگ برنگی پتنگوں سے بھرا رہا ۔ ضلع گوجرانوالہ میں پتنگ بازی جیسا خونی کھیل جاری ہے ، پولیس کی غفلت اور لاپروا ئی کی وجہ سے گلی محلوں میں ڈور اور پتنگوں کی فروخت جاری ہے ، دن بھر چھوٹے بڑے سب چھتوں پر پتنگ بازی کرتے نظر آتے ہیں جبکہ نوجوانوں نے پابندی کے احکامات کو ہوا میں اڑاتے ہوئے پارکوں ، سڑکوں اور ریل کی پٹڑیوں پر بھی پتنگ بازی شروع کر دی ہے ۔ دوسری طرف پولیس کا کہنا تھا کہ مختلف مقامات پر کارروائی کرتے ہوئے ایک ماہ کے دوران 78 پتنگ بازوں کو گرفتار کیا گیا ہے ۔