وزیر آباد میں ساڑھے نو بجے کے قریب کوسٹر بے قابو ہوکر نالہ پلکھو سے ملحقہ گیمن جوہڑ میں جا گری جس کے باعث کوسٹر میں سوار ایک کم سن بچی سمیت چار افراد ہلاک اور 13 افراد زخمی ہوگئے۔ زخمیوں میں خواتین اور بچے بھی شامل ہیں۔ اطلاع ملنے پر ریسکیو 1122 کی ایمبولنسز، کشتیاں اور غوطہ خور موقع پر پہنچ گئے جنہوں نے متاثرین کو تحصیل ہیڈکوارٹر ہسپتال وزیر آباد منتقل کر دیا۔
ریسکیو کے مطابق ہلاک ہونے والے چار افراد میں ایک سالہ بچی ماریہ بھی شامل ہے۔ مسافروں کو نالہ سے نکالنے کیلئے ریسکیو آپریشن تاحال جاری ہے جبکہ کوسٹر کے ڈرائیور کو بھی ریسکیو کرلیا گیا جس کی حالت خطرے سے باہر ہے۔
دوسری طرف اطلاع ملنے پر اسسٹنٹ کمشنر وزیرآباد وقار حسین اور اے ایس پی اکرام اللہ خان بھی موقع پر پہنچ گئے اور ریسکیو آپریشن کی نگرانی اور واقعہ کی تحقیقات کررہے ہیں۔
عینی شاہدین کے مطابق دوران سفر کوسٹر کے ڈرائیور کے دل میں تکلیف ہوئی جس کے باعث کوسٹر بے قابو ہوگئی اور نالے میں جا گری۔
