عرفات کالونی :ناقص سیوریج مکینوں کیلئے درد سر ،احتجاجی مظاہرہ

گلی نمبر20میں بیس روزسے گنداپانی جمع،خواتین اوربچے گھروں میں محصور ہوگئے نمازیوں کوبھی مشکلات،واساحکام اطلاع کے باوجود کوئی نوٹس نہیں لے رہے :شرکا
گوجرانوالہ (سٹی رپورٹر )عرفات کالونی میں ناقص سیوریج سسٹم کے باعث ملحقہ گلیوں میں گندا پانی مکینوں کیلئے درد سر بن گیا جس پر اہل علاقہ نے واساکیخلاف احتجاجی مظاہرہ کیا ،فیروزوالہ روڈ عرفات کالونی گلی نمبر 20کے مکینوں افتخار علی ،ثناء اﷲ بٹ ،اعجاز اکر م نے احتجاج کرتے ہوئے کہاکہ پچھلے 20دنوں سے عرفات کالونی گلی نمبر 20میں سیوریج کا گندا پانی جمع ہے جس کی وجہ سے خواتین اور بچے گھروں میں محصورہوکر رہ گئے ہیں، راستہ نہ ہونے کی وجہ سے مسجد میں جانیوالے نمازی بھی اس اذیت سے دوچار ہیں،واساحکام کو متعدد مرتبہ اطلاع دی گئی مگر کوئی شنوائی نہیں ہوئی،ڈاکٹر شہزاد یونس،بابو اجمل ،فیصل انصاری ،سلمہ بی بی ،نسرین بیگم ،ارم اور صفیہ بی بی نے مطالبہ کیا کہ ہمیں اس گندے پانی سے نجات دلائی جائے ۔مظاہرین کا کہنا تھا کہ اگرفوری طور پر علاقہ کو صاف نہ کیاگیاتوکمشنراور ڈپٹی کمشنردفاتر کے باہر احتجاج کرینگے جس کی ذمہ داری واسا حکام پر ہوگی۔