اپوزیشن کی سیاست بند گلی میں داخل ہوچکی:عثمان ڈار

تحریک انصاف کے مرکزی رہنما عثمان ڈار نے کہا ہے کہ اپوزیشن کی سیاست بند گلی میں داخل ہوچکی ہے اور یہ اب ایسی جگہ پر ہیں جہاں آگے دیوار اور پیچھے گڑھا ہے ، پی ڈی ایم کا ذاتی مفادات پر مبنی ‘‘انقلاب ’’ان کے گلے کی ہڈی بن گیا ہے ،حکومت اپوزیشن کے ساتھ معیشت ، خارجہ پالیسی اور انتخابی اصلاحات پر بات کرنے کیلئے تیار ہے لیکن مذاکرات کی میز پر آنے کیلئے ریلیف دینے کی شرط قبول نہیں کی جائے گی ، گیارہ جماعتوں نے اتحاد بنا کر جلسوں کی صورت میں جو ‘‘انقلاب ’’ بر پا کیا تھا اس کاآج کہیں نام و نشان بھی نہیں ۔ان خیالات کا اظہار انہوں نے چیئرمین گورننگ بورڈ خواجہ صفدر میڈیکل کالج سیالکوٹ زین شبیر سے ملاقات کے دوران گفتگو کرتے ہوئے کیا۔ اس موقع پر تحریک انصاف سٹی کارپوریشن کے سیکرٹری اطلاعات ونشریات میاں اعجاز جاوید بھی موجود تھے ۔ عثمان ڈارنے کہا کہ وزیر اعظم عمران خان نیک نیتی اور عزم کی وجہ سے ملک کیلئے کامیابیاں سمیٹ رہے ہیں جبکہ مخالفین کے حصے میں سوائے ناکامیوں کے کچھ نہیں آیا۔ انہوں نے کہا کہ حکومت آئینی مدت پوری کرے گی ۔