پشاور ہائی کورٹ نے ضم اضلاع کے تمام ڈپٹی کمشنرز کو بارڈر جانے والے راستوں پر مرغی اور گوشت کی برآمد کی اجازت نہ دینےکا حکم دے دیا۔
پشاورہائی کورٹ میں پولٹری کی قیمتوں سے متعلق کیس کی سماعت ہوئی، سیکرٹری فوڈ ، اسپیشل سیکرٹری ایگریکلچر، فوڈ کمیشن کے وفاقی کمشنر ، ڈی سیز اور اے جی اور اے اے جی عدالت میں پیش ہوئے۔
چیف جسٹس نے پولٹری کی قیمتوں میں اضافے پر برہمی کا اظہار کرتے ہوئے ریمارکس دیے کہ جب تک گوشت اور چکن کی قیمتیں کم نہیں ہوتیں ایکسپورٹ کی اجازت نہیں ہوگی، قیمتیں بڑھ رہی ہیں اور حکومت خاموش تماشائی بنی ہوئی ہے۔
چیف جسٹس قیصر رشید خان نے مزید ریمارکس میں کہا کہ مرغی اور گوشت کی قیمتیں عوام کی پہنچ سے دو ہوتی جارہی ہیں، کوئی خرید ہی نہیں سکتا چینی اور آٹا مافیا کے بعد لگتا ہے اب گوشت اور مرغی مافیا سرگرم ہوگیا ہے ۔
چیف جسٹس نے حکم دیا کہ اس کا کوئی حل نکالا جائے اور جو پولٹری فارمنگ ہے اس کی بہتری کے لیے اقدامات کیے جائیں، سماعت 10 جون تک ملتوی کردی گئی ۔
