امریکی جریدے وال اسٹریٹ جرنل نے انکشاف کیا ہے کہ امریکی محکمہ خارجہ نے طالبان کے کابل پر قبضے سے ایک ماہ پہلے 13 جولائی کو وزارت خارجہ کو ایک میمو بھیجا تھا جس میں اس خدشے کا اظہار کیا تھا کہ طالبان کابل پر قبضہ کر سکتے ہیں۔
وال اسٹریٹ جرنل نے امریکی عہدے داروں کے حوالے سے انکشاف کیا ہے کہ 13 جولائی کو امریکی محکمہ خارجہ کے انٹرنل کیبل پر ایک میمو بھیجا گیا جس میں افغانستان میں موجود امریکی حکام نے افغانستان پر طالبان کے جلد قبضے سے خبردار کیا تھا۔
افغانستان سے فوجی انخلا کی تاریخ دینے کے فوری بعد جاری انتباہی میمو میں امریکی حکام کا کہنا تھا کہ طالبان افغان علاقوں پر تیزی سے قابض ہو رہے ہیں اور ہو سکتا ہے کہ افغان فورسز طالبان کو نہ روک پائیں۔
امریکی حکام نے بحران کے خاتمے اور انخلا کا عمل تیز کرنے سے متعلق بائیڈن انتظامیہ کو کچھ سفارشات بھی پیش کی تھیں۔
امریکی صدر جو بائیڈن نے حال ہی میں ایک ٹی وی انٹرویو میں کہا تھا کہ افغانستان کے بارے میں انٹیلی جنس رپورٹوں میں متفقہ طور پر کوئی رائے نہیں پیش کی گئی تھی تاہم اس سال کے آخر تک کابل پر طالبان کے قبضے کا امکان ضرور تھا۔
