آرمی چیف جنرل قمر جاوید باجوہ کے ساتھ شطرنج کھیلنے والی طالبہ اب خود اپنے اسکول میں شطرنج کی ٹیچر کی ذمہ داریاں نبھارہی ہیں۔
خیال رہے کہ 2018 میں آرمی چیف جنرل قمر جاوید باجوہ نےغیر سرکاری تنظیم زندگی ٹرسٹ کے تحت چلنے والے مختلف سرکاری اسکولوں کے طلباء وطالبات سے جنرل ہیڈ کوارٹرز (جی ایچ کیو) راولپنڈی میں ملاقات کی تھی۔
اس دوران آرمی چیف نے ایک طالبہ ملیحہ کے ساتھ شطرنج بھی کھیلی تھی۔
پیر کے روز آرمی چیف جنرل قمر جاوید باجوہ نے اپنے دورہ کراچی کے دوران زندگی ٹرسٹ کے تحت چلنے والے اسکول کا بھی دورہ کیا۔
اس موقع پر آرمی چیف نے ملیحہ سے بھی ملاقات کی جوکہ اب اسی اسکول میں طالبات کو شطرنج سکھاتی ہیں۔
ملیحہ کا کہنا ہےکہ شطرنج بنیادی طور پر ایک جنگی کھیل ہے، آرمی چیف کے ساتھ شطرنج کھیلنا میرے لیے اعزاز کی بات ہے، آرمی چیف کے ساتھ شطرنج کھیل کر میری دلچسپی میں اور اضافہ ہوا اور آرمی چیف نے بھی میرا حوصلہ بڑھایا۔
ملیحہ اب اپنے اسکول ایس ایم بی فاطمہ جناح میں ہی ٹیچنگ کررہی ہیں اور طالبات کو شطرنج سکھاتی ہیں ، اس کے ساتھ ہی اپنی تعلیم بھی جاری رکھی ہوئی ہیں۔
ملیحہ کا کہنا تھا کہ شطرنج ذہن کا کھیل ہے جو کہ ذہنی صحت کے لیے اہم ہے، اس سے تخلیقی صلاحیتوں میں اضافہ ہوتا ہے، ایسے میں جب نجی اسکول بھی اس کھیل پر توجہ نہیں دیتے، ایک سرکاری اسکول میں اس کی کلاسیں ہونا منفرد بات ہے۔
