کراچی: لیجنڈ اداکار عمر شریف کی میت آج صبح ترکی سے کراچی پہنچائی گئی جس کے بعد میت کو ایدھی سرد خانے منتقل کردیا گیا۔
عمر شریف کے جسدِ خاکی کو رہائش گاہ پر لانے کے لیے انتظامات مکمل کرلیے گئے ہیں اور گلشن اقبال میں واقع رہائش گاہ پر سکیورٹی کے سخت انتظامات ہیں، علاقہ پولیس کی نفری اور ٹریفک پولیس اہلکاروں کو تعینات کردیاگیا ہے۔
نماز جنازہ کے انتظامات حتمی مراحل میں داخل
دوسری جانب عمر شریف پارک میں نماز جنازہ کے انتظامات حتمی مراحل میں داخل ہوگئے ہیں، جنازہ گاہ میں عوام کی بڑی تعداد میں شرکت کو دیکھتے ہوئے لاؤڈ اسپیکر پہنچادیےگئے ہیں۔
میت کی منتقلی سے قبل بلاول چورنگی سے ضیاءالدین جانے والی سڑک کوٹریفک کے لیے بند کردیاجائے گا۔
عمر شریف کی میت علی الصبح کراچی پہنچائی گئی
اس سے قبل ترک ائیر لائن کی پرواز TK-708نے رات 12 بج کر 53 منٹ پر استنبول سے ٹیک آف کیا جو صبح 5 بجکر 33 منٹ پر کراچی ائیرپورٹ پہنچی۔
عمر شریف کی بیوہ زرین غزل بھی میت کے ہمراہ کراچی پہنچیں۔
کراچی پہنچنے کے بعد عمر شریف کی میت ائیر پورٹ کارگو ٹرمینل سے ان کے بیٹوں کے حوالے کردی گئی جس کےبعد میت کو کراچی کے ایدھی سرد خانے منتقل کیا گیا ہے۔
لیجنڈ اداکار کی میت کو قومی پرچم میں لپیٹا گیا
عمر شریف کی میت لے جانے والی ایمبولینس پر پھولوں کی پتیاں نچھاور کی گئیں جب کہ میت کی سرد خانے روانگی کے دوران قافلے میں عزیز و اقارب، مداحوں اور شہریوں کی بڑی تعداد شریک تھی۔
لیجنڈ اداکار عمر شریف کی میت کو قومی پرچم میں لپیٹا گیا ہے۔
دوسری جانب صوبائی وزیر سعید غنی کا کہنا ہےکہ عمر شریف کی نمازجنازہ سہ پہر تین بجے عمر شریف پارک میں ادا کی جائےگی اور ان کی تدفین عبداللہ شاہ غازی مزار کے احاطے میں کی جائےگی۔
عمر شریف کے بیٹے کے مطابق ان کے والد کی نماز جنازہ مولانا بشیر فاروقی پڑھائیں گے۔
خیال رہےکہ عمر شریف ہفتہ دو اکتوبر کو جرمنی کے اسپتال میں انتقال کرگئے تھے۔
امریکا میں عمر شریف کے معالج ڈاکٹر طارق شہاب کے مطابق جرمنی کے اسپتال میں ڈائیلیسز کے 4 گھنٹے بعد عمر شریف کی طبیعت اچانک بگڑی اور دل کا دورہ پڑا جس سے وہ انتقال کرگئے۔
