خیبرپختونخوا میں دوسرے مرحلے میں ہونے والے بلدیاتی انتخابات میں مسلم لیگ (ن) کے دو اہم رہنماؤں کے صاحبزادے شکست کھا گئے۔
مسلم لیگ (ن) کے رہنما اور خیبرپختونخوا کے سابق گورنر سردار مہتاب عباسی کے بیٹے سردار شمعون یار خان اور صوبائی صدر امیر مقام کے بیٹے نیاز احمد نے تحریک انصاف کے امیدواروں سے شکست کھائی۔
سردار مہتاب عباسی کے بیٹے سردار شمعون یار خان نے ایبٹ آباد کی سٹی کونسل کے الیکشن میں 45 ہزار 206 ووٹ لیے اور دوسرے نمبر پر رہے جب کہ ان کے مدمقابل تحریک انصاف کے امیدوار سردار شجاع نبی نے 58 ہزار 626 ووٹ لے کر میدان مار لیا۔
دوسری جانب ضلع شانگلہ کی تحصیل الپوری سے امیر مقام کے بیٹے نیاز احمد سٹی کونسل کے الیکشن میں 12 ہزار 453 ووٹ حاصل کرکے دوسرے نمبر پر رہے جب کہ ان کے حریف تحریک انصاف کے امیدوار وقار احمد خان نے 16 ہزار 80 ووٹ لے کر میدان مارلیا۔
