کراچی: گورنر سندھ کامران خان ٹیسوری کا کہنا ہے کہ مجھے صرف 4 گھنٹے دیں تو میں آٹے کی قیمت 180 سے 100 تک لے آؤں گا۔
کامران ٹیسوری کراچی میں بفرزون بلاک 15 میں عوام کے ساتھ سحری کرنے پہنچے تو گورنر کو اپنے درمیان دیکھ کر لوگ خوش ہوگئے اور لوگوں نے ان کے ساتھ تصاویر بنوائیں۔
اس موقع پر گورنر سندھ نے کہا کہ سندھ حکومت کو خط لکھ کر پوچھیں گے کہ سڑکوں کی تعمیر کے لیے پیسے کس کو دیے، سڑکیں کیوں نہیں بنیں۔
کامران ٹیسوری کا کہنا تھا کہ اب مجھے اس شہر اور صوبے کے کام ہوتے نظر آرہے ہیں، کراچی کو آئی ٹی سی سٹی، بنائیں گے، لوگوں کو کاروبار سکھائیں گے۔
انہوں نے کہا کہ ہر ٹاؤن میں رضاکاروں کی ایک ٹیم جمع کررہے ہیں، رضاکار لوگوں کے مسائل کے بارے میں آگاہ کریں گے، اگر حکومت نے مسائل حل نہ کیے تو ہم کریں گے، کسی کے ساتھ کالج، یونیورسٹی اور ادارے میں زیادتی ہو تو وہ گورنر ہاؤس کی گھنٹی بجائے، گھنٹی وہ بجائے گا اور گھنٹہ ہم بجائیں گے۔
28 ویں سحری کے لئے بفرزون پہنچا ،والہانہ استقبال،پر بفرزون کے عوام کا مشکور ہوں،180 روپے کلو ملنے والا آٹا صرف 4 گھنٹے میں 100 روپے میں مل سکتا ہے،گورنر ایڈوائزی کمیٹی تشکیل دے رہا ہوں، ایکسپورٹ ڈیولپمینٹ فنڈ میں سے کراچی کے حصہ کے لئے وزیر اعظم سے بات کروں گا pic.twitter.com/P41at9Macn
— Kamran Tessori (@KamranTessoriPk) April 18, 2023
گورنر کا کہنا تھا کہ ایڈوائزری کمیٹی بنارہا ہوں، کمیٹی میں علماء مشائخ، ڈاکٹر،انجینئر ہوں گے جو بھی اس شہر اور صوبے کی بہتری کے لیے مشورہ دیگا اس پر کام کرینگے، ہر 15 دن بعد کھلی کچہری ہوگی، کسی بھی صنعتکار کے پلاٹ کے ٹرانسفر کا مسئلہ ہو یا کوئی اور مسئلہ ہو تو وہ گونر ہاؤس میں رابطہ کرے۔
