اسلام آباد: وزیر مملکت برائے پیٹرولیم مصدق ملک نے کہا ہےکہ اسحاق ڈار کو کوئی بھی ذمے داری دی جائے وہ اس کےاہل ہیں۔
جیونیوز کے پروگرام جیو پاکستان میں گفتگو کرتے ہوئے مصدق ملک نے کہا کہ نگران وزیراعظم کے لیے لیڈرآف دی ہاؤس تمام سیاسی جماعتوں سے مشاورت کریں گے، اسحاق ڈار معاملات بہت اچھے انداز میں لے کر چلے ہیں، انہوں نے کہا ہے کہ کوئی بھی ذمےداری دی جائے وہ نبھائیں گے۔
انہوں نے کہا کہ اسحاق ڈار کو کوئی بھی ذمے داری دی جائے ، وہ اس کےاہل ہیں، سیاسی جوڑ توڑ پر اس وقت کوئی تبصرہ نہیں کرسکتا۔
مصدق ملک کا کہنا تھاکہ نئی مردم شماری پر اعتراضات ہوگئے جنہیں دور کرنے میں کئی ماہ لگ گئے، نئی مردم شماری اگر نوٹیفائی کردی جائے تو اس کے مطابق الیکشن میں 4 سے 6 ماہ چاہئیں، حکومت کا مؤقف ہےکہ پرانی مردم شماری پر الیکشن کرا لیا جائے، نئی حلقہ بندیوں کے لیے 4 سے 6 ماہ درکار ہوں گے۔
انہوں نے مزید کہا کہ (ن) لیگ کامؤقف ہے کہ پرانی حلقہ بندیوں کی بنیاد پر الیکشن کرالیے جائیں، بہت سی جماعتیں ہمارے مؤقف کی حمایت کررہی ہیں۔
ایک سوال کے جواب میں مصدق ملک کا کہنا تھا کہ بیس ریٹ اس لیے نوٹیفائی کیاگیاہے تاکہ فیول ایڈجسمنٹ کےکوارٹرلی چارجزکم چارج ہوں۔
