پاکستان انڈر 16 فٹبال ٹیم کو ساف چیمپئن شپ میں شرکت کیلئے منگل کی رات کو وزارت داخلہ کی جانب سے این او سی جاری کیا گیا جو فٹبال ٹیم کیلئے امید کی کرن ہے۔
قومی انڈر 16 ٹیم کی ساف چیمپئن شپ میں شرکت کی کوششیں جاری ہیں، این او سی کا اجرا سابق معاون خصوصی شزا فاطمہ کی کوششوں سے ہوا۔
متعلقہ وزارتوں سے این او سی کے بعد پی ایف ایف ٹیم کو بھیجنے کیلئے پھر کوشاں ہے۔
پی ایف ایف ذرائع کے مطابق قومی انڈر 16 ٹیم کیلئے بھوٹان کی فلائٹس کا بندوبست کیا جارہا ہے ، ایک ساتھ فلائٹس ملنا مشکل ہے کیوں کہ بھوٹان کے آپشن محدود ہیں۔
پاکستان انڈر 16 ٹیم کو گزشتہ روز بھوٹان روانہ ہونا تھا، پی ایف ایف کو کل شام تک این او سی نہیں ملا تھا، این او سی نہ ملنے پر پی ایف ایف نے ایونٹ سے دستبردار ہونے کا فیصلہ کرلیا تھا۔
ذرائع کے مطابق میڈیا پر خبریں نشر ہونے کے بعد ٹیم کی این او سی کیلئے کوششیں کی گئیں۔
ڈی جی پی ایس بی شعیب کھوسو کا کہنا ہے کہ پاکستان اسپورٹس بورڈ آئی پی سی منسٹری سے این او سی کا منتظر ہے ۔
