بالی وڈ اداکار ورون دھون نے اپنی زندگی میں پیش آنے والا خوفناک واقعہ سنادیا۔
حال ہی میں ایک پوڈکاسٹ کے دوران ورون دھون نے انکشاف کیا کہ ایک خاتون ان کا تعاقب کرتے ہوئے ان کے گھر میں گھس گئی تھی۔
ورون دھون نے بتایا کہ ایک مرتبہ بااثر شخص کی بیوی بغیر اجازت میرے گھر میں گھس گئی، مجھے اس شخص کی پوزیشن یاد نہیں لیکن اس شخص کی اہلیہ کو میری جیسی آواز استعمال کرکے دھوکا دیا گیا تھا، کوئی شخص اس خاتون سے میرا نام لے کر بات کررہا تھا اور یہی وجہ تھی کہ وہ خاتون آواز میری سمجھ کر میرے گھر تک چلی آئی‘۔
ورون دھون نے مزید بتایا کہ’ حیران کن بات یہ تھی کہ وہ خاتون میرے گھر کے حوالے سے سب جانتی تھی اور بضد تھی کہ میں نے انہیں یقین دلایا ہے کہ میں اس کیلئے اپنا گھر چھوڑدوں گا‘۔
اداکار نے کہا کہ’اس واقعے نے مجھے خوفزدہ کردیا تھا جس کے بعد مجھے پولیس کو بلانا پڑا اور پھر خاتون کانسٹیبل نے آکر اس معاملے کو سنبھالا تھا‘۔
دوران گفتگو اداکار نے عوامی سطح پر بھی اپنے ساتھ پیش آئے نامناسب واقعات کو شیئر کیا اور بتایاکہ ایک خاتون مداح مجھے زبردستی عوامی مقام پر بوسہ دے چکی ہیں جو کہ مجھے ناگوار گزرا تھا‘۔
واضح رہے کہ ورون دھون نے 2021 میں اپنی قریبی دوست نتاشا سے شادی کی تھی جس کے بعد جون 2024میں ان کے ہاں بیٹی کی پیدائش ہوئی۔
