ویسے تو اب ہر چیز ہی اسمارٹ ہوتی جا رہی ہے مگر کیا آئینے بھی اسمارٹ ہوسکتے ہیں؟
جی ہاں واقعی لاس ویگاس میں جاری کنزیومر الیکٹرونکس شو (سی ای ایس) کے دوران فرانسیسی کمپنی Withings نے آرٹی فیشل انٹیلی جنس (اے آئی) ٹیکنالوجی سے لیس آئینہ متعارف کرایا۔
اومینا نامی یہ قدآدم آئینہ صحت کا تجزیہ کرنے میں مدد فراہم کرتا ہے۔
کمپنی کے مطابق یہ اسمارٹ آئینہ آپ کی صحت کے مختلف پہلوؤں کی جانچ پڑتال کرتا ہے اور پھر ایک اے آئی وائس اسسٹنٹ فیڈ بیک فراہم کرتا ہے۔
اگر صارف چاہے تو پھر وہ کسی ڈاکٹر سے آن لائن رابطہ کرکے مشاورت بھی کرسکتا ہے (اگر آپ کے ملک میں یہ سہولت موجود ہو تو)۔
یہ آئینہ آپ کا جسمانی وزن بتا سکتا ہے، دل کی صحت اور میٹابولک صحت کی جانچ کرسکتا ہے۔
اسی طرح یہ اسمارٹ واچ، بلڈ پریشر مانیٹر یا اسمارٹ بیڈ کے ڈیٹا کو بھی اکٹھا کرکے صحت کے بارے میں بتا سکتا ہے۔
کمپنی نے بتایا کہ اے آئی وائس اسسٹنٹ سے رئیل ٹائم فیڈبیک کے علاوہ مختلف معاملات میں رہنمائی بھی فراہم کی جاسکتی ہے یا وہ آپ کا حوصلہ بڑھانے کی کوشش بھی کرسکتا ہے۔
مگر ابھی یہ آئینہ فروخت کے لیے پیش نہیں کیا جا رہا بلکہ یہ فی الحال ایک کانسیپٹ ڈیوائس ہے۔
کمپنی کے مطابق ابھی اس پر کام کیا جا رہا ہے اور یہ کب تک مکمل طور پر تیار ہو جائے گا، یہ کہنا ابھی مشکل ہے۔
