ماضی کے مقبول فلمی ہیرو افضل خان (جان ریمبو ) نے شادی شدہ مردوں کو بیوی کے غصے کے وقت خاموش رہنے کا مشورہ دے دیا۔
حال ہی میں اداکار ریمبو، اداکار سعود کے ہمراہ نجی ٹی وی چینل کے مارننگ شو میں شریک ہوئے جس دوران میزبان مدیحہ نقوی نے دونوں شخصیات سے کامیاب ازدواجی زندگی کا سوال کیا۔
سوال کے جواب پر جان ریمبو کا کہنا تھا کہ’اگر مرد بیوی کو عزت دیں تو لوگ سمجھتے ہیں کہ یہ بیوی سے ڈرتے ہیں لیکن درحقیقت بیوی سے ڈرتا کوئی نہیں ہے، بیوی کو عزت اور پیار دیا جاتا ہے‘ ۔
اداکار ریمبو کے مطابق ’جو مرد اپنی بیوی یا کسی خاتون کو عزت نہ دے وہ مرد نہیں ہوتا، ہمیں یہ تسلیم کرنا چاہیے کہ جس طرح سے مرد کو غصہ آتا ہے اسی طرح عورت بھی غصے میں آکر اونچا بول سکتی ہے لیکن ہماری کامیاب ازدواجی زندگی کا کمال یہ ہے کہ اگر صاحبہ کو غصہ آئے تو میں نہیں بولتا اور مجھے غصہ آئے تو صاحبہ نہیں بولتی، اس کا فائدہ یہ ہے کہ ہماری لڑائی کے دوران بھی بات نہیں بڑھتی، کیونکہ اگر کسی ایک کو غصہ آئے اور دوسرا بھی جواب دے تو بات بڑھ جاتی ہے‘ ۔
دوران گفتگو ریمبو کا کہنا تھا کہ ’شادی شدہ مردوں کو مشورہ ہے کہ جب بیگم بولے تو آپ خاموش ہو جائیں، 5 منٹ وہ خود اپنی غلطی تسلیم کرے گی اور پھر آپ کیلئے چائے کا کپ بھی پیش کرے گی لیکن اگر آپ بھی جواب دیں گے تو بات بڑھ جائے گی اور وہ فون کرکے اپنی والدہ کو بھی بلاسکتی ہے لہٰذا اس طرح کی باتوں سے گریز کرنا چاہیے‘۔
واضح رہے کہ اداکار ریمبو اور اداکارہ صاحبہ کا شمار پاکستانی شوبز کے کامیاب ازدواجی جوڑوں میں کیا جاتا ہے، جوڑے نے1997 میں شادی کی تھی ان کے دو بیٹے ہیں۔
