کراچی: سرجانی تیسر ٹاؤن میں شادی کی تقریب کے دوران فائرنگ سے زخمی ہونے والا ایک اور بچہ اسپتال میں دوران علاج چل بسا۔
سرجانی تیسر ٹاؤن سیکٹر 35 سی میں گزشتہ روز شادی کی تقریب ہوئی جس میں باراتیوں نے فائرنگ کی۔
پولیس کا کہنا ہےکہ بارات کے دوران گھر کے باہر فائرنگ سے ایک کمسن بچہ جاں بحق اور ایک بچے سمیت 2 افراد زخمی ہوگئے تھے، زخمیوں میں 6 سال کا ایلن مسیح اور 30 سال کا روبن شامل تھے۔
پولیس نے بتایا کہ دونوں زخمیوں کا اسپتال میں علاج جاری تھا تاہم دوران علاج زخمی ہونے والا بچہ ایلن مسیح بھی دم توڑ ہوگیا جس کے بعد واقعہ میں جاں بحق ہونے والے بچوں کی تعداد 2 ہوگئی ہے۔
پولیس کے مطابق بارات لےکر جانے والے افراد ہوائی فائرنگ کر رہے تھے کہ پولیس نے موقع پر پہنچ کر فائرنگ میں باراتیوں سے پستول برآمد کرلی تھی جب کہ فائرنگ کے واقعے میں ملوث 3 مشتبہ ملزمان بھی حراست میں لیے جاچکے ہیں۔
