کراچی: کورنگی میں ناخلف بیٹے نے سابق سکیورٹی گارڈ کو پیسے دے کر والد کو قتل کروا دیا۔
تفصیلات کے مطابق زمان ٹاؤن تھانے کی حدود کورنگی 51-c میں 18 فروری 2025 کو سید محمد متین خان نامی شخص کو گھر کے قریب فائرنگ کر کے قتل کر دیا گیا تھا۔
پولیس نے واقےہ میں ملوث مقتول کے بیٹے دانش، اس کی بیوی طوبیٰ، دانش کی دوست ایمن اور 2 ملزمان محمد ظریف اور شہید اللہ کو گرفتار کر کے ان کے قبضے سے نائن ایم ایم پستول اور تھانہ کورنگی صنعتی ایریا کی حدود سے چھینی گئی موٹر سائیکل برآمد کر لی جب کہ مرکزی ملزم سیال خان کی گرفتاری کے لیے کوشش کی جا رہی ہے۔
پولیس نے بتایا کہ مقتول متین کیبل کا کام کرتا تھا اور ملزم دانش اپنے والد کے ساتھ کام کرتا تھا، ملزم دانش کی ایمن نامی خاتون کے ساتھ دوستی ہو گئی جس کے بعد وہ پیسوں میں ہیر پھیر کرنے لگا، ملزم کے والد کو پتا چلا تو انہوں نے 8 ماہ قبل ملزم دانش کو کام سے الگ کر دیا اور گھر سے نکال دیا جس کے بعد ملزم اپنے سسرال میں جا کر رہنے لگا۔
پولیس کے مطابق سسرال والوں نے اس کے والد کو سمجھایا تو وہ واپس گھر آگیا اور کلفٹن میں ملازمت کرنے لگا جہاں اس کی ملاقات سیال خان نامی سکیورٹی گارڈ سے ہوئی جو بنوں کا رہائشی اور پیشہ ور ملزم تھا، سیال خان نے بعد ازاں نوکری چھوڑ دی تاہم ملزم دانش اس سے رابطے میں رہا اور اس کے ساتھ مل کر وارداتیں بھی کرنے لگا۔
پولیس نے بتایا کہ 2 ماہ قبل ملزم کا اپنے باپ سے پھر جھگڑا ہوا جس پر اس کے باپ نے اسے بے عزت کیا تو ملزم نے سیال خان سے باپ کو قتل کرنے کی بات کی اور 3 لاکھ روپے میں معاملہ طے کیا۔
